Польшийн Краков хотноо 7 дугаар сарын 2-3-ны өдрүүдэд болсон Ардчилсан орнуудын хамтын нөхөрлөл /АОХН/-ийн 10 жилийн ойд зориулсан сайд нарын түвшний уулзалтад Гадаад харилцааны сайд Г.Занданшатар оролцов.

НҮБ-ын Дүрвэгсдийн дээд коммиссарын газрын Бээжин дэх Бүсийн төлөөлөгч ноён Джессепе Де Винсентиис 2010 оны 7 дугаар сарын 5-ны өдөр Гадаад харилцааны сайд Г.Занданшатарт Итгэмжлэх захидлаа гардуулав. Шинэ ажилд томилогдсонтой нь холбогдуулан Гадаад харилцааны сайд түүнд баяр хүргээд НҮБ-ын ДДКГ, Монгол Улсын Засгийн газрын хоорондын хамтын ажиллагааны үр дүн, цаашдын зорилтын талаар санал солилцов.

Худалдаа, эдийн засаг, шинжлэх ухаан-техникийн талаар хамтран ажиллах Монгол, Болгарын Засгийн газар хоорондын комиссын ээлжит V хуралдаан 6 дугаар сарын 30-наас 7 дугаар сарын 1-ний өдрүүдэд Улаанбаатар хотноо болж өндөрлөв. Комиссын хуралдааныг Монгол Улсын Эрүүл мэндийн сайд, Комиссын Монголын хэсгийн дарга С.Ламбаа, Бүгд Найрамдах Болгар Улсын Эдийн засаг, эрчим хүч, аялал жуулчлалын дэд сайд, Комиссын Болгарын хэсгийн дарга Иво Маринов нар тус тус тэргүүлэв.

Монгол Улс, Бүгд Найрамдах Узбекистан Улсын ГХЯ-дын улс төрийн газрын захирлуудын хоёрдугаар зөвлөлдөх уулзалт саяхан Ташкент  хотноо болов. Зөвлөлдөх уулзалтаар хоёр орны харилцаа, хамтын ажиллагааны өргөн хүрээтэй асуудлууд, олон улсын болон бүс нутгийн асуудлаар санал солилцож, тодорхой  тохиролцоонд хүржээ.

Монгол Улсын засгийн газрын урилгаар Саудын Арабын Газрын тос, эрдэс баялагийн сайд Али Ибрахим Аль-Наими тэргүүтэй төлөөлөгчид 2010 оны 6 дугаар сарын 29-30-ний өдрүүдэд Монгол Улсад албан ёсны айлчлал хийв. Энэхүү айлчлал нь Монгол Улс, Саудын Арабын Вант Улсын хооронд 2007 оны 2 дугаар сарын 12-нд дипломат харилцаа тогтоосноос хойш Саудын Арабын Засгийн газрын гишүүний хэмжээнд хийсэн анхны айлчлал болсноороо  ач холбогдолтой болов.

Монгол Улсаас Бүгд Найрамдах Узбекистан Улсад хавсран суугаа Онц бөгөөд Бүрэн эрхт Элчин сайд О.Очиржав Бүгд Найрамдах Узбекистан Улсын Гадаад хэргийн сайд В.И.Норовт 6 дугаар сарын 12-ны өдөр Итгэмжлэх Жуух Бичгээ өргөн барив. Итгэмжлэх Жуух Бичгийг өргөн барих ёслолын үеэр Бүгд Найрамдах Узбекистан Улсын Гадаад хэргийн сайд В.И.Норов Элчин сайд О.Очиржавт хандаж Бүгд Найрамдах Узбекистан Улс Монгол Улстай худалдаа, эдийн засгийн харилцаагаа сэргээх бодлого баримталж буйгаа мэдэгдэж, Узбекистан, Монголын худалдаа, эдийн засгийн хамтын ажиллагааг өргөжүүлэн хөгжүүлэх өргөн боломж бий хэмээн цохон тэмдэглэв.
Онц бөгөөд Бүрэн эрхт Элчин сайд О.Очиржав хоёр талын харилцаа, худалдаа, эдийн засгийн хамтын ажиллагааг харилцан ашигтай өргөжүүлэхийн төлөө ажиллах болно гэдгээ илэрхийллээ.

Монгол Улсаас Мексикийн Нэгдсэн Улсад суух Онц бөгөөд Бүрэн эрхт Элчин сайд Х. Бэхбат 2010 оны 6 дугаар сарын 24-ний өдөр Мексикийн Нэгдсэн  Улсын Ерөнхийлөгч  Ф.Калдеронд Итгэмжлэх жуух бичгээ барив. Элчин сайд Х. Бэхбатыг ИЖБ-гээ барьсантай нь холбогдуулан Ерөнхийлөгч Ф. Калдерон,  Гадаад хэргийн сайд хатагтай Патрисиа Эспиноса нар хүлээн авч уулзаж, хоёр талын харилцааны асуудлаар санал солилцов.

Монгол Улсын Гадаад харилцааны яам, Гадаадын хөрөнгө оруулалтын газар,  БХҮХ (Бүсчилсэн хөгжлийн Үндэсний хороо),  ХБЗ (Хангайн бүсийн зөвлөл: Үүнд Архангай, Булган, Баянхонгор, Өвөрхангай, Орхон, Хөвсгөл зэрэг аймгууд багтаж байна) хамтран энэ оны 6 дугаар  сарын 24-25-ны өдөр “Хангайн бүсийн Хөрөнгө оруулагчдын  чуулга уулзалт-2010”-ыг Эрдэнэт  хотноо зохион байгуулж байна.

Монгол Улсын ГХЯ,  Холбооны Бүгд Найрамдах Бразил Улс-ын ГХЯ-д хоорондын улс төрийн хоёрдугаар зөвлөлдөх уулзалт 2010 оны 6 дугаар сарын 24-ний өдөр Улаанбаатар хотноо болов.

Бүгд Найрамдах Итали Улсад ажлын айлчлал хийж буй Монгол Улсын Гадаад харилцааны сайд Г.Занданшатар Италийн Гадаад хэргийн сайд Ф.Фраттинитэй албан ёсны уулзалт хийлээ. Уулзалтаар Монгол-Италийн хооронд дипломат харилцаа тогтоосны 40 жилийн ойн жил болж байгааг цохон тэмдэглээд цаашид харилцаагаа улам эрчимжүүлэх бодлоготой байгаагаа илэрхийллээ.