Монгол Улсын Гадаад харилцааны яам, Монгол Улсын Их Сургуулийн Олон улсын харилцааны сургуулийн хооронд 2010 - 2012 онд хамтран ажиллах тухай санамж бичигт ГХЯ-ны Төрийн захиргааны удирдлагын газрын захирал Б.Баярсайхан, Олон улсын харилцааны сургуулийн захирал Б.Хулдорж нар гарын үсэг зурав.

ГАДААД ХАРИЛЦААНЫ ЯАМ, ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН ЯАМНЫ ХООРОНД 2010 – 2012 ОНД ХАМТРАН АЖИЛЛАХ ТУХАЙ САНАМЖ БИЧИГ-Т ГАДААД ХАРИЛЦААНЫ САЙД Г.ЗАНДАНШАТАР, ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН САЙД Т.БАДАМЖУНАЙ НАР ГАРЫН ҮСЭГ ЗУРАВ.

Монгол Улсын Засгийн газраас батлан хэрэгжүүлж буй Гадаад харилцааг эдийн засагжуулах хөтөлбөрт хүнс, хөдөө аж ахуй, хөнгөн үйлдвэрийн салбарын чиглэлээр тусгагдсан заалтуудыг хэрэгжүүлэх ажлын хүрээнд Гадаад харилцааны яам, Хүнс, хөдөө аж ахуй, хөнгөн үйлдвэрийн яамны хооронд 2010 - 2012 онд хамтран ажиллахаар тохиролцож байгаа юм.

Монгол Улсын Ерөнхий сайд С.Батболдын урилгаар БНХАУ-ын Төрийн Зөвлөлийн Ерөнхий сайд Вэнь Зябао 2010 оны 6 дугаар сарын 1-2-ны өдрүүдэд Монгол Улсад албан ёсны айлчлал хийнэ.

Гадаад харилцааны яамны “Мутрын түшээ” танхимд сонгодог хөгжмийн хаан “Төгөлдөр хуур”-ыг залах ёслол болов. Нээлтийн ажиллагаанд Нийслэлийн соёл урлагийн газрын дарга, хөгжмийн зохиолч Ц.Пүрэвхүү, Соёл Урлагийн Их сургуулийн багш Ц.Уртнасан, Морин хуурын уралдааны тэргүүн шагналт П.Тэмүүжин, СУИС-ийн оюутан, дуучин Б.Гомбо-Очир болон Монгол Улсын Гадаад харилцааны сайдын зөвлөх Г.Жаргалсайхан, ГХЯ-ны Төрийн захиргаа удирдлагын газрын атташе Б.Мөнхжин нар төгөлдөр хуурын анхны аяар хөгжмийн дээжээ толилуулж хүрэлцэн ирсэн хамт олны сонорыг мялаав.

Холбооны Бүгд Найрамдах Герман Улсын Гадаад хэргийн сайд Г.Вестервеллийн урилгаар албан ёсны айлчлал хийж буй Монгол Улсын Гадаад харилцааны сайд Г.Занданшатар Герман улсын зарим иргэнийг төрийн одон медалиар шагналаа. Мөн энэ үеэр "Дуурийг дэмжих найз нар" холбооны 10 жилийн ойд зориулан бүтээсэн номын дээжийг гардуулах ёслолын арга хэмжээ болж өнгөрсөн юм.

Монгол Улсаас Кувейт Улсад суугаа Элчин сайд К.Сайраан Кувейт Улсын Ерөнхий сайд Шейх Нассер Мохаммед Аль-Ахмед Аль Сабах-тай 5 дугаар сарын 19-ний өдөр Эмирын ордон “Баян палас”-т уулзав.

Монгол Улсын Гадаад харилцааны сайд Г.Занданшатар ХБНГУ-ын Холбооны Гадаад хэргийн сайд Г.Вестервелле-гийн урилгаар Герман Улсад хийж буй албан ёсны айлчлал 2010 оны 5 дугаар сарын 19-ний өдөр эхэллээ.

Монгол Улсын Ерөнхий сайд С.Батболд, Бүгд Найрамдах Чех Улсын Засгийн газрын дарга Ян Фишер нар 2010 оны 5 дугаар сарын 19-ний өдөр Улаанбаатар хотноо уулзаж, хоёр талын харилцааны асуудлаар хэлэлцээ хийв.

БНСУ-ын Инчёон хотноо 2010 оны 5 дугаар сарын 13-19-ний өдөр хуралдсан НҮБ-ын Ази, Номхон далайн Эдийн засаг, нийгмийн комиссын 66 дугаар чуулган өнөөдөр ажлаа өндөрлөлөө. Энэ удаагийн чуулган “Мянганы хөгжлийн зорилтуудыг хэрэгжүүлэхэд тулгарч буй бэрхшээлийг шийдвэрлэх: Санхүүгийн тогтвортой тогтолцоог дэмжих; Ногоон өсөлт буюу технологи нэвтрүүлэх, хөрөнгө санхүүжүүлэх замаар байгаль орчинд халгүй эдийн засгийн өсөлтийг хангах нь” сэдвээр явагдаж, Комиссын гишүүн нийт 60 орчим орны Засгийн газрын төлөөлөгч оролцлоо.

Гадаад харилцааны сайд Г.Занданшатар энэ сарын 18–22-ны өдрүүдэд ХБНГУ-ын Холбооны Гадаад хэргийн сайд ноён Г.Вестервеллегийн урилгаар ХБНГУ-д албан ёсны айлчлал хийхээр мордлоо. Энэ удаагийн айлчлал нь 1999 онд ГХ-ны сайд хамгийн сүүлд ХБНГУ-д айлчилснаас хойш 11 жилийн дараа хийж байгаагаараа онцлогтой юм.